Recent Posts

"କାଳିଜାଈରେ ସନ୍ଧ୍ୟା" - ଉତ୍କଳମଣୀ ଗୋପବନ୍ଧୁ ଦାସ (ପୁରୁଣା ପାଠ୍ୟପୁସ୍ତକ କବିତା) - ପଢନ୍ତୁ ଓଡ଼ିଆରେ

May 19, 2018 | View
"କାଳିଜାଈରେ ସନ୍ଧ୍ୟା" - ଉତ୍କଳମଣୀ ଗୋପବନ୍ଧୁ ଦାସ (ପୁରୁଣା ପାଠ୍ୟପୁସ୍ତକ କବିତା) - ପଢନ୍ତୁ ଓଡ଼ିଆରେ, Kalijaire Sandhya odia poem by Gopabandhu das, download read
"କାଳିଜାଈରେ ସନ୍ଧ୍ୟା" ଉତ୍କଳମଣୀ ଗୋପବନ୍ଧୁ ଦାସଙ୍କ ଦ୍ୱାରା ରଚନା କରାଯାଇଥିବା ଏକ କବିତା ଯାହା ବହୁ ବର୍ଷ ତଳେ ସପ୍ତମ ଶ୍ରେଣୀ ସାହିତ୍ୟ ବହିରେ ସ୍ଥାନ ପାଇଥିଲା । ପୁନର୍ବାର ସ୍ମୃତି ଉଜାଗର ନିମନ୍ତେ ଆମ୍ଭ ୱେବସାଇଟରେ କେବଳ ଆପଣମାନଙ୍କ ପାଇଁ କବିତାଟିକୁ ଲେଖୁଛୁ । 
"କାଳିଜାଈରେ ସନ୍ଧ୍ୟା"
ରଚନା: ଉତ୍କଳମଣୀ ଗୋପବନ୍ଧୁ ଦାସ

କାତ ଧରି ଧୀରେ ନାଉରି
ନାଆ ଦେଇଛି ମେଲି,
ଉତ୍ତରା ପବନ ଆଗକୁ
ଦିଏ ତଲେଇ ଠେଲି ।

ନାଚି ନାଚି ଚାଲେ ତରଣୀ,
ନାଚେ ଶତ ତରଙ୍ଗ,
ଉଡିଆସି ଜଳେ ଭାସନ୍ତି
କାହିଁ କେତେ ବିହଙ୍ଗ ।

ହଂସ ହଂସରାଳି ଖେଳନ୍ତି
ଢେଉ-ଦୋଳିରେ ଖେଳ,
ଆସିଲାଣି ଖରା ମଉଳି,
ଛାଇଲେଉଟା ବେଳ ।

ମାଛରଙ୍କା ପକ୍ଷୀ ଉଡ଼ଇ
ଡେଣା ଝାଡି ଆକାଶେ,
ଲକ୍ଷ୍ୟ ରଖି ଜଳେ ବୁଡ଼ଇ
ମୀନ ଧରିବା ଆଶେ ।

ଚାହୁଁ ଚାହୁଁ ଯାଇ ଗଭୀର
ଜଳେ ପଡିଲା ନାଆ,
ଅକାତ ପାଣି ସେ ଗଣ୍ଡରେ
କାଳିଜାଈ ତା ନାଆଁ ।

କାତ ରଖି ନାବେ ନାଉରି
ନେଲା ଆହୁଲା କରେ,
ମାଆ କାଳିଜାଈ ସୁମରି
ମଙ୍ଗ ସଳଖି ଧରେ ।

ନୀଳ ଉର୍ମିମାଳା ଉଠଇ,
ବହେ ପବନ ଖର,
ଛିଟିକି ପଡ଼ଇ ନାଆରେ
ପାଣି ଥରକୁ ଥର ।

ନାଆ ପାଶେ ଖେଳେ ମଗର,
ବୁଡି ଛଟକେ ଉଠେ
ଖେଳେ ଶିଶୁମାର, ସାଙ୍କୁଚ
ପୁଣି ଲାଙ୍ଗୁଡ଼ ପିଟେ ।

ପାରି ହୋଇ ଗଣ୍ଡ ବିଷମ
ନାଆ ଲଗିଲା କୂଳେ,
ସୁଷମା ନିରେଖି ଉଠିଲି
ଶ୍ୟାମ ଶଇଳ-ଚୂଳେ ।

ବୁଡ଼ିଯାଉଥିଲେ ସବିତା
ଦୂର ଭାଲେରି ଶିଖେ,
ଉଡ଼ିଯାଉଥିଲେ ବିହଙ୍ଗେ
ସୁଖେ ଜଟିଆ ମୁଖେ ।

ଅସ୍ତଗାମୀ ରବି-କିରଣ
ପଡି ଚିଲିକାଜଳେ
ଦିଶଇ ପ୍ରବାଳ ବରଣ,
ଶୋଭା ବଚନ ବଳେ ।

ଚଢ଼େଇଗୁହାର ଚୂଡ଼ାକୁ
ଚାହିଁ ଉଡ଼ଇ ଏରା
ଲୋହିତ ଧବଳ ପକ୍ଷରେ
କେଡ଼େ ଦିଶଇ ତୋରା ।

ଭାଲେରି ପାହାଡ଼ ଉଢ଼ାଳେ
ଲୁଚିଗଲେଣି ରବି,
ପଶ୍ଚିମ ଆକାଶେ ଝଟକେ
ପୀତଲୋହିତ ଛବି ।

ଦିଶେ ପାରିକୁଦ ମାଲୁଦ,
ଦୂରୁଁ ଛାୟା ପରାଏ
ସନ୍ଧ୍ୟାତାରା ନଭେ ହୀରକ
ସମ କି ଶୋଭା ପାଏ ।

ଦେଖୁଛି ଚିଲିକା, ସ୍ଵପନେ
ତୋର ଅତୀତ ଶିରୀ,
ମୁହାଣୁ ତୋହର ବୋଇତ
ଯେବେ ଥିବ ବାହାରି ।

ସିନ୍ଧୁ ପାରେ ଯାଇ ଓଡ଼ିଆ
ପୁଏ କରି ବେପାର
ଆଣିଥିବେ ବହି ଦେଶକୁ
ଧନ ରତ୍ନ ଅପାର ।

ପୁଣି ଏ ମୁହାଣ ପାଶେ କି
ଗଢ଼ା ହେବ ବନ୍ଦର ?
ବିପଣିମାଳାରେ ବିଜନ
ବେଳା ହେବ ମୁଖର ?

ତୋ ଜଳେ ଶରତେ ଭାସନ୍ତି
ଯଥା ମରାଳପନ୍ତି,
ଭାସିବେ କି ସିନ୍ଧୁ ସଲିଳେ
କହ ପୋତପଙ୍କତି ?

ବିଦେଶବେପାରୁଁ ଆଣିବେ
ଦେଶେ ନାନା ବିଭବ,
ଫେରିବ କି ଶୋଭାମୟି ଗୋ,
ତୋର ଲୁପ୍ତ ଗୌରବ ?

  Download PDF

ସଂଗ୍ରାହକ ଓ ପ୍ରେରକ: ଶ୍ରୀ ସୁଜ୍ଞାନୀ ବିଶ୍ଵାଳ, ଅନୁଗୋଳ, ଓଡ଼ିଶା

କବି ପରିଚୟ
ଉତ୍କଳମଣୀ ଗୋପବନ୍ଧୁ ଦାସ
ଗୋପବନ୍ଧୁ ଦାସ: (୧୮୭୭–୧୯୨୮) ଉତ୍କଳମଣି ନାମରେ ଖ୍ୟାତ । ଓଡ଼ିଶାର ଜଣେ ସ୍ଵାଧିନତା ସଂଗ୍ରାମୀ, କବି, ଲେଖକ ଓ ଦୈନିକ ଖବର କାଗଜ ସମାଜ ଓ ସତ୍ୟବାଦୀ ପତ୍ରିକାର ପ୍ରତିଷ୍ଠାତା ଥିଲେ । ସ୍ଵତନ୍ତ୍ର ଓଡ଼ିଶା ପ୍ରଦେଶ ଗଠନରେ ତାଙ୍କର ଯୋଗଦାନ ଅତୁଳନୀୟ ରହିଥିଲା ।

3 comments:

  1. ଏହି ଭଳି ଆହୁରି ପଦ୍ୟ ଓ ଗଦ୍ୟ ଛାଡନ୍ତୁ ଯାହାକୁ ପଢ଼ି ଆମେ ବଡ଼ ହେଇଚୁ । ଧନ୍ୟବାଦ ଆପଣଙ୍କ ଏହି ଏକ ବିରାଟ ପ୍ରଚେଷ୍ଟା ପାଇଁ ।

    ReplyDelete
  2. ଏହ। ମୋର FAVOURITE କବିତା ,ଆଜିବି ମୋର ମନେଅଛି ।

    ReplyDelete